Naodat op d’n 11e van de 11e de vastlaovend in ’t Zawpensriek al mit get nuuj aktiviteite waor ingewied
woort ’t väör de – gespanne – nuuj hóaghede toch ech d’n hóagste tied
op hun wachde ein kort sezoen mit väöl hóagtepuntje, weinig nachrös en väöl lol
de Zawpenstempel waor in eder geval mit alle aktiviteite tot de nok toe vol
Mit meister Piet en Riet es seniore en Ton es Iërezawpens al in ’t spotleech
koos g’r op Facebook zeen wie de jóngste zoon van ’t Prinsepaar bienao ein besljaag kreeg
opèns stónge dao zien awwers Eric II mit Birgit op de bühne te straole
’t waor de Zawpense weer gelök óm ènne echte Roepoeper es Prins bènne te haole
ein fiëske volgde in ’t “Bachus Hoes”, mit väöl beer en kilo’s frikkedelle
en op de kènjermiddig bleek dat Jeugprinsepaar Mick en Evy hun dit jaor maog gaon vergezelle
de griepepidemie greep in ‘t sezoen good om zich haer ónger alle Zawpense
mer dat heel ze neet aaf van ein bezeuk aan Genk en Tudder äöver de landsjgrenze
in dat zelfde weekend woort nao de Mansluujzitting nog de resepsie in Buchte bezoog
logies, want bie de Louvermen stóng de zöster van Prinses Birgit, Ester, achter de resepsietoog
wujer is de wieze raod nog väör ein smeekbede van Prinses Birgit gezwich
en daoróm koos ’t zeen dat zie op de resepsie van de Reube ein emosjoneel weurdje tot häör väörmalige dörpsgenote haet gerich
nao Start TV en krankebezeuk bleke de hènne nog ummer door ’t griepvirus bevange
mer ’t ganse gevuchel is toch nao ’t hanekriëjhoes, ’t Sjeepsbelbal en Óarsbaek gegange
vervolges waor ’t tied väör ein gigantiese resepsie in ’t Patternaat
mede door de kómmende verkezinge woort ’t nao leefs viefenhawf oer erg laat
de hóaghede höbbe in eder geval genaote van de enorme attensies en aandach
en hawwe d’n daag d’r nao toch waal ein bitje las van eine erg korte nach
Prins Eric II tróf smörges zien Prinses Birgit mit “nur noch Schuhe an” in bèd aan
mer daonao kooste ze d’r oppe senioremiddig mit de get awwere luuj weer good taegenaan
Jeugprins Mick en Jeugprinses Evy krege aafgeloupe goonsdig in Bor de sjläötel van ’t Zawpensriek in hun bezit
d’n daag daonao waor Prins Eric II aan de bäört en kreeg de Prinses door ‘n verspraeking van de Vors opèns de bienaam “An” mit
op vriedig troch eine sjóane bóntje kènjeroptoch vanaaf bazisjóal de Kingbaek door de straote
jónk geliërd is awt gedaon, en dat mót v’r zóa laote
friedessaoves kaom ein ènj aan ’t fameuze Gabriëlbal dat in 1981 waor begoos bie Lies en Sjaak
de Gabriëlle höbbe, same mit hoeskapel de Roepoepers, d’r al dae tied ein spiktakel van gemaak
tied väör nuuj inisjatieve, eine nujen opzèt en weer zeen dan ouch benuujd nao volgend jaor
houpelik stuit de nuuj formule mit nuuj organizatore dan al klaor
op zaoterdig trochte de hóaghede weer door ’t törp achter hofkapel Daag & Nach
zie woorte óm 5 oer weer in ’t Patternaat väör ein heerlik dinere mit de Prins verwach
daonao nao kaffee-zaal Aurora väör ’t Verkesbal van lèsgeneump meziekgezelsjap
’t bal deeg ziene naam ech iër aan en toujour leep d’n tap
op zónjig waore de hermenieje weer bie de Marotte en de Flarisse on tour
óm opper tied trök te zeen väör ’t inmiddels fameuze Roepoepers-Vastelaoveskonkoer
in de gróate vastelaovesoptoch stóng Prinses Birgit neet oppe wagel mer troch gewuen mit, wat has te gedach
en Marie-Christine Hurxkens, Marita mit ós Prinses en de Beegse Vruikes woorte door de jury mit de iëste prieze bedach
de Gawstrèkkers zeen ouch volop bezig mit zich oppernuuj oet te vènje
mer nog ff in awwe stijl wós Peter van de Klundert d’n titel Gawzekäöning 2018 aan zich te bènje
en noe staon v’r dan hie nao ’n kort, krachtig en prachtig sezoen biejein óm Frenske aanstaeke te gaon
’t is noe ech gedaon, laot same gerös ein traon

LAAT EEN REACTIE ACHTER

Please enter your comment!
Please enter your name here