Op Vastelaoveszaoterdig stuit tradisjineel de Róndjgank en ’t dinere mit de Prins op ’t program. Helaas vanwaege COVID-19 höbbe weer dit jaor gein hóagwaardighede kènne oetrope, mer dat haet ós d’r neet van weerhawte óm eine Róndjgank en ’t dinere zónger Prins te verzörge.
Ónger ein strakke blaw loch en straolend zunke trókke de Zawpense same mit Hofkapel Daag & Nach door de stroate van Beeg. Normaal gespraoke gaon weer alle hóagwaardighede ophaole, mer dit jaor veel deze eer aan Fons Jennen. Fons haet te kènne gegaeve óm nao 34 jaor gekostumeerd lid te gezeen gewaes van de Rv11 te gaon stoppe. Weer wole Fons daorom ‘ns in ’t zunke zette.
Fons is op 27 april 1987 toegestraoje es lid van de Rv11. Destieds ónger aanveuring van Thieu Stauder, vanaaf 1990 ónger Frank Hermans en sinds 2016 ónger Pascal de Vries. Vanaaf 9 mei 1987 t/m 11 november 2000 (13 jaor) is Fons sikkretaris gewaes en vanaaf dae tied beheert hae ouch al ’t volledige archief van al ós beeldmateriaal (dia, foto’s en beeldopnames).
In 2002 woort bie de Kestangeleboum nao Rv11 vergadering de “Zawpense Zoep Reakening” (ZZR) opgerich. Vanaaf dees oprichting t/m oktoaber 2021 (binao 20 jaor) haet Fon dit tot in de puntjes beheerd.
Es oud gedeende haet hae dek rech van spraeke es hae ein positieve kritische naot luet huere. Weer wardere dat zeer. Daonaeve is Fon altied de helpende handj bie tal van aktiviteite bènne de Zawpense.
T ’t dagelijks bestuur van Vastelaoves Vereiniging De Zawpense haet daorom beslaote óm Fons te beneume tot Senator van De Zawpense!
Fons, nogmaals perfisiat en weer wille dich bedanke väör 34 sjóan jaore en houpe nog väöle jaore op diene steun en toeverlaot te maoge raekene.
