1
al op 10e van de 11e woort ’t neet gewuen mer knatsjgek 4×11-jubelejumsezoen flink in gang gesjaote
väöl luuj höbbe doe van blikke Heinikke en de Andre Hazes Band genaote
en op d’n 11e van d’n 11e óm 11 op 11 koos te wèthawwer Pieter zeen bie ’t aansjlaon van ’t iëste jubelejumvaat
de aaftrap voor ein geweldig sezoen en van de Beeg-Geuf-Leech-Aksie waor ein feit in ós aller Patternaat
2
mit get Romeine, ènne auto en duo Henk & Ton oppe bühn woorte in ‘t 2e weekend van jannewarie de hóaghede spektakulaer geproklameerd
mit Iërezawpens Tilly Vola en Seniorepaar Bert en Leida Wessels waor de lies drek al mit toppers geseerd
toen vervolges ouch nog Jubelejumprinsepaar Rik en Maud in ’t bühneleech stónge te prónke
waor de waeg nao ein suksesvol jubeleujumjaor al metein beklónke
3
op de spannende kènjermiddig waore d’r hoofrolle väör Asterix en Obelix
die wóste oeteindelik de Romeine te verjage en touverde Jeugprinsepaar Dave en Isa oet ’t niks
daomit waor ’t rieke hóaghede kompleet en koos ’t jubelejumsezoen noe ech beginne
en bie ’t motto “woróm gewuen doon es ’t ouch knatsjgek kènt” maogs se dich van alles verzinne
4
de gebroekelikke aktiviteite woorte bezooch mit ouch weer de boetelandsje trips d’r bie
in Tudder waor ’t drök en in Genk maakde Fransje Bauer ech jederein harstikke blie
in ’t Zawpenseriek vónj de tradisjonele mansluujzitting bie de Knevel ouch weer plaats in eine prima sfeer
in de zaal van Aurora waor de ram oetverkochde vrouwluujzitting in hippiesfere ein gróat sukses en dus in 2020 weer
5
ouch de kranke en get awwer luuj zeen door ós hóaghede absoluut neet vergaete deze kiër
de meiste luukes en ouch de Prins van de Perganaze vónje ’t dèks eine hiële iër
’t jaorlikse treffe van alle vastelaovesvereiniginge van de gemeinte Zitterd-Gelaen-Beeg woort in de Hanenhof georganiseerd
de Flarisse en co. mótte toch ech gaon kieke wie v’r dat in de anger stadsdeile väöl baeter höbbe gearrangeerd
6
neet ónvermeldj maoge ouch nog ’t bezeuk aan ’t Sjeepsbelbal en de resepsie van de Doorzètters in Neerbik blieve
dit alles óm de spanning nao die gekke daag toe tot gróate huegte op te drieve
ein bezeuk aan ’t Armada van ós Jeugprinsepaar Dave en Isa zou de Zawpense sjóan staon en dat is dus ouch gedaon
dat Jubelejumprins Rik in Obbeeg voetbalt is allein mer óm de luuj dao get te liëre en de fusie soepel te laote gaon
7
de van datum verangerde Jubelejumprinseresepsie is wie gewuen, dus op knatsjgekke meneer gegange
oerelank lepe de luuj langs de resepsietaofel óm dao ouch nog ‘ns eine flinke tegoedbón van Touverlandj te óntvange
oppe senioremiddig kooste Seniorepaar Bert en Leida hun 11 puntje proklamere en de luuj genete van ein lekker nónnevot
mit sjieke optraejes en ein echte buut koos dae gezellige middig väör de seniore neet mië kepot
8
naodat v’r al nao ‘t Katerrriek väör de bienao neet te huere oetzending van Start-TV mooste aafzakke
krege de hóaghede dao op goonsdig en dónderdig de sjläötel van ’t Zawpenseriek te pakke
toen kooste alle remme los väör de 5 knatsjgekke daag
en laog ós de kènjeroptoch op ein vreug tiedstip mit väöl entoezjaste kènjer gaaroets neet zwaor oppe maag
9
’t nuje Aurora-awwieverbal en ouch dat van ós hofkapel veulde gelökkig wie vanawts, zóa wie ouch de róndjgang van de hóaghede mit Daag & Nach
hoestraitäörs Peter en Jacqueline woorte aansjloetend es pap en mam van de Prins deze kiër ‘ns lekker in de watte gelach
inmiddels vele d’r al diverse kranke hóaghede en anger vastelaovesvierders te bespäöre
mer de sjok van de plotselinge dóad van de pas gedekoreerde Chris waor toch waal ’t ergste wat koos gebäöre
10
en toch ginge daonao de aktiviteite in ‘t Zawpenseriek door, weer dènke dat Chris dat zóa van ós zouw höbbe verwach
dus waor d’r op zónjig ’t Vastelaoveskonkoer van zien Roepoepers mit es alternatieve lokasie “kaffee de bóntje boer”, die prima waor bedach
naodat ein waek geleje nog bienao de mössje van ’t taak leke te valle
moos v’r väör d’n optoch toch nog mer iës ‘ns äöver de flinke wèndj gaon kalle
11
en dus höbbe Jos Smeets, femilie Van de Berg en Gewuen ómdat ’t kènt nao de prachtige bóntje optoch, gruetsj mit de bekers op de bühn gestange
en op deensdig, ónger toezeend oug van de Burgemeister, kruende zich Wim Smits tot gawzekäöning nao get ritjes ónger de gaws van dyneema te zeen gegange
de vlag is inmiddels gestreke en dus kóm v’r langsaam tot ’t ènj, g’r höb al lang genóg gewach
mer neet naodat v’r uch ein ekstraatje in dit 4 x 11-jaorig jubelejumsezoen ónger de aandach höbbe gebrach
12
vanwaege ’t jubelejumfiësweekend mit Hemelvaart neet 11 mer 12 versregels deze kiër in dit gedich
want ein fiëstent mit Juicy Lucy en ein echte dörpsdaag oppe Steinwaeg kump toch langsaam in zich
in de houp uch dan allemaol weer te maoge treffe, want dan zeen v’r harstikke blie
sjloet v’r de vastelaovend noe ech aaf en gaon v’r Frenske mit vuur en vlam aan die prie
Zawpense Beeg,
Steemo
