Aan alle inwoners van ós Beegs Zawpenseriek
Vanaaf ’t móment dat weer zeen oetgerope höbbe weer es hóagwaardighede maoge genete van ‘ne sjóane Vastelaovend in Beeg. Dees momente hawwe weer neet zónger uch kènne belaeve. Daoróm wille weer bie deze alle inwoners van Beeg, Papenhaove en Sjipperskirk bedanke dat weer same mit uch 5 daag lank höbbe kènne en maoge genete.
Weer wille de Zawpense bedanke väör de organizasie van de Vastelaovend en de ónvermeujbare inzèt óm de Vastelaovend jeder jaor weer tot ein sukses te make. Daobie wurd ouch erg gewaardeerd dat de keffees in Beeg, ós en alle Vastelaovesvierders, höbbe bedeend van ’s mörges vreug tot ’s aoves … vreug.
’t Is altied sjóan óm te zeen wie luuj zichzelf mit de Vastelaovend muzikaal, artistiek en kreatief van hunne bèste kantj laote zeen en daobie altied de inspirasie vènje óm de meist kluerrieke en gekke pekskes oet de kas te riete. Zóaväöl talent en krejasies kènt mènnig dörp sjloes op zeen!
Alles kaom mit name tot oetdrökking tiejes de Gróate Vastelaovesoptoch van Beeg. Gewuen ómdat ’t kènt’, de Beegter Bleumkes en Jos Houben höbbe zich van hunne bèste kantj laote zeen en zeen daoróm bekróand door de zjurie. Daoneave höbbe weer genaote van de versjillende optraejes mit die daag wobie groepe zich samegepak höbbe óm de Vastelaovend in Beeg, same, nog sjóaner te make.
Meziek speelt ummer ’n belangrieke rol mit de Vastelaovend en weer wille dan ouch de Hofkapel Daag en Nach, de Roepoepers en Nuchter Vertroch bedanke väör hunne muzikale inbrèng, altied zuvere stömming en aanstaekelikke sjpas.
Weer kènne in eder geval neet wachte óm ’t Vastelaovessezoen op 11 november weer te kènne äöpene en höbbe d’r vertroewe in dat ózze opvolgers ouch maoge genete van dit sjóane dörp!
Names de Zawpense en de hóagwaardighede van 2023, bedank en tot kómmend sezoen! Zawpense Alaaf
