Gepaerdskäöteld door ‘t lekker waerke
fits ich gans mónter nao de Vaerdam
gaon in Beeg de Maas äöver mit’t vaerke
verknoesj de sjtiele diek mit de laere tram
Zeen de kezelhuip aan de Belzje kantj
gehaold in ómgaeving en oeterwaard
houpelik hiltj me aan vernuf de handj
en blif dao ‘t hoagwaerdige gesjpaard
Ein waor fitsparedies lik achter de päöl
en de Maas geuf de ómgaeving’n zieël
riej ein rundje äöver Uukhaove -Gäöl
die route is aafwisselend in z’n gehieël
Op de wèntjerdieke doon ich genete
en laot miene geis in vrieheid wènje
krieg al trappentaere’n geras gewete
wo anges is dat mit-oere nog te vènje
Zèt alle zintuge in de hoagste standj
huër de veugel die zich aansjtrenge
kiek nao blome en gewasse op ‘t landj
zeen wie flot dat de vröchte dege lenge
Via de Boje Näögenaord en de Wisse
vang ich de natuur pès in mien tuppe
op ‘n terras in Vuch’t kan neet misse
kus eine broene pater mich de luppe
In Uukhaove num ich weer ‘t puntje
kóm via de Maasbandj en de Ur trök
zoa besjleet ich lanksem mien rundje
en tot toes is nog mer ein klein sjtök
Bevrie lief en geis mit ein frisje naas
es se door alle ambras urges mit zits
en vuntj me nurges baat of ras helaas
dan blif mer ein dènk äöver, de fits
