Wat e laeve
Beeg geit loester aan `t laeve gaeve
de ‘Zawpense’ bènje de kat op`t spek
Hun vastelaovesriek kan noe straeve
mer nao waat, dat wèt Henske de gek.
Dat wurt remptempe in zale en straote
träöters brènge sfeer mit helsj leweit
Goje ammezjuur hiltj neet van maote
ouch es dich huere en zeen vergeit.
In de optocht kómme laevemaekers langs
de einselgenger hiltj e sjeif motto te kiek
Dreuvige apostele mit rammelesjangs
en geduipde aezele mit kaetelemeziek.
Ein löstig fiës wobie me dans en sprungk
en lekker sjónkele es zèngende kóare
Me`t leefste Limburgse sjlaegers zungk
mit Hollese duujt me wetjes in de óare.
Hóaglöstige doon hun de zaenge gaeve
die vènje in alles väörop gaon zóa gaaf
Dat sjlaagmiëstig blif sjalle ‘wat e laeve’
en besloete jeder ek mit ein kreftig alaaf.
De vastelaovend sjöp eine rumere geis
dus bedènk väör `t sjóanste fiës get geks
Es se aan `t idee van laef `t laeve mit deis
dan kump se vanzelf op eine angere teks.
Guus Kitzen
