Leef Zawpense,
Vraem tieje zeen ‘t! Ein nog vraemder Vastelaovessezoen geit ’t waere. Äöveral óm ós haer zuus se nog evenemente aafgelasj waere en hiël väöl zittinge, balle en optochte gaon al neet door. Weer es Vastelaovesvereiniging De Zawpense hawte dageliks ’t nuutjs in de gate en blieve houpe dat d’r oeteindelik toch nog ein bietje gevierd kènt waere. Corona duit ós get aan, mer weer laote ós neet volledig laam lègke!
De regelkes gaon waarsjienlijk nog get strenger waere, mer weer wólle uch alvas van ’t volgende op de huegte stèlle. Wo al iërder de Beegter Aovende zeen aafgelasj zulle de Sintermerteviering in samewirking mit ’t Sintermerterkomitee en de jaorvergadering op 11 november ouch neet door gaon. In 2021 zal d’r gein Prinsoetreuping, Prinseresepsie, kènjermiddig en senioremiddig zeen. Helaas zal ouch de optoch op vastelaovesmaonjig aafgelasj waere; de gemeinte zal namelik gein optochvergunning verliëne!
Wat mit de Vastelaovesdaag zelf wujer waal of neet kènt is tot dit moment nog redelik koffiedik kieke, mer weer vreze dat de mäögelikhede väör de gebroekelikke invölling van die daag hiël beperk tot niks zulle blieve of waere.
Weer zouwe de Zawpense neet zeen óm toch óndanks de beperkinge en regels toch nog te probere ein bietje Vastelaovend te viere. Dát v’r get mótte bedènke wat waal kènt en dat v’r get zulle doon steit waal vas; wat dat betruf ….. ’t kènt nog alle kanj op! Weer blieve aktief, mer waal bènne de veiligheidsmarge!
