14.1 C
Grevenbicht
vrijdag, 24 mei 2024

Nuje hóaghede V.V. De Zawpense Beeg 2024

Op zaoterdig 13 jannewarie j.l. zeen in Zawpensetempel Oos Hoes de nuje hóaghede van ’t Zawpenseriek bekènd gemaak. In naovolging van de good óntvange edisie van 2023, woort ouch dit jaor weer gekaoze óm de kènjermiddig en ’t oetrope van de Prins op eine daag te organizere.

De bühne woort deze aovend ómgeboewd tot ein gróats podium wo de glitter and glamour van de Amerikaanse showbizz vanaaf knalde, ein ech Las Beegas. Naodat op ’t fruitmesjien eindelik de jackpot woort gedriëjdt, kaom ’t nuje Prinsepaar es hoofpries teväörsjien.

Prins Marc I (Savelkoul) dae es 47ste Prins van V.V de Zawpense Beeg zal regere, is in ’t dagelikse laeve väörman bie Dolmans Landscaping Group. De gróatste hobby van Prins Marc I is meziek make en hae speelt al jaore mit väöl plezeer sjuuf. De Prins beoefent zien hobby bie eine hiële rit aan vereiniginge, namelik Käöninklikke Hermenie Aurora, Hofkapel Daag & Nach, Z.H. de Roepoepers, Big Band Beeg en Die Himmlische Heinies.

Prinses Marloes (Savelkoul-Wijshoff) wirk es pedagogisch coach en beleidsmedewirker bie Wee-Play Kènjeropvang. In häöre vrieje tied geit ze gaer ein stök wanjele en probeert ze häöre kondisie op peil te hawte bie Reshape. Es d’r dan nog get tied äöverblif is de Prinses kreatief bezig mit punnike en iezerdraod. Tot slot maak ós Prinses ouch meziek, zie is al ruum 25 jaor lid van Hermenie St. Cecilia en speelt dao op dit moment es straotmuzikant klarinet.

Ós Prinsepaar haet same drie dochters, hun sterrekiendje Suus* (2014), Saar van 8 jaor en Eef van 6 jaor. Saar en Eef zeen allebei harstikke gek van de Vastelaovend.

Dezelfde aovend woorte ouch Senioreprinsepaar Jan Goossens en Lilian Martens oetgerope. Senioreprins Jan en Senioreprinses Lilian zeen beide sinds aafgeloupe jaor mit prepension gegange en genete van hunne vriejen tied. Ein oetgelaeze kans om noe volop mit te gaon in ’t fiësgedruus van de Beegter Vastelaovend.

Senioreprinsepaar Jan en Lilian zeen net es Prinses Marloes lid van Harmonie St. Cecilia, wo Jan ’t instrumentebeheer ónger zien hoede haet en Lilian driede klarinet speelt. Natuurlik wurdt d’r mit de Vastelaovend mit de hermenie deilgenomme aan de optochte en vènje ze ’t ouch leuk om mit eine vrunjegroep “op stap” te gaon in ’t Beegse. In hunne vriejen tied is ’t d’r op oet trèkke mit de karavan eine favoriete bezigheid. ’t Leefste gaon ze dan nao de berg óm dao lang wanjeltochte te make. Senioreprinsepaar Jan en Lilian höbbe 2 kènjer, Sanne (36) en Jens (33). Beide wone ze dich bie de pap en mam in ’t prachtige Beeg.

De titel van Iërezawpens is dit jaor neet väör ein emes, mer ein koppel. They en Marie Christine Hurxkens gaon dit jaor es Iërezawpensepaar de Beegter Vastelaovend in. Beide höbbe zie hun spaore verdeend door zich jaore langk in te zètte väör Käöninklikke Hermenie Aurora, buurtvereiniging de Kempen, ‘t St. Nicolaas Comité en de Brandwonden Stichting.

De jeug zal dit jaor väörgegange waere door Jeugprins Bas (Meuwissen) en Jeugprinses Jet (de Clercq). Jeugprins Bas en Jeugprinses Jet zitten allebei in groep 7 van Bazissjóal de Kingbaek in Beeg en staon te trappele óm Vastelaovend te viere.

Wult geer mië weite äöver ós hóaghede? Kiek dan väör ein oetgebreidere kènnismaking op www.zawpense.nl.

Alle hóagwaardigheidsbekleijers zulle resipiejere op zaoterdig 3 fibberwarie aanstaonde en waal in de Zawpensetempel Oos Hoes. Aanvangstied is 19.11 oer.

gerelateerde artikelen

LAAT EEN REACTIE ACHTER

Vul alstublieft uw commentaar in!
Vul hier uw naam in

Hoofdadverteerders

Aankomende evenementen

Verenigingen

laatste nieuws