Ózze sikkretaris Eric Mulleners haet te kènne gegaeve óm nao 25 jaor zien taak äöver te wille drage aan ein nuuj generasie. In 1998, Rempetempe van Staai tot op de Kempe, ginge Prins Eric I en Prinses Monique same mit Senioreprinsepaar Wil en Mia Valkenburg, Jeugprinsepaar Niels Kirkels en Stephany van de Geer en Iërezawpens Martin Salden väörop in de Beegter Vastelaovend.
Dat haet Eric geweite, want vlak daonao wól hae waal get mië beteikene väör de Vastelaovend in Beeg en is hae in 1999 Fons Jennen opgevolg es sikkretaris. Good ingewirk door Fons haet Eric dees taak mit verve 25 jaor volgehawte!!! Daobie waor hae ouch bie de jeugaafdeling van Armada/Argo erg betrokke en is nog väörzitter gewaes van ós Hofkapel Daag en Nach.
Waat Eric deeg, deeg hae mit volle äövertuging, altied in ’t belang van de vereiniging. Wieväöl tillefoontjes, meeltjes, appjes en vergaderinge zouw hae waal neet höbbe gehad. Op momente haw Eric ein hotline mit de gemeinte, mer sjus wie ózze väörzitter kaom hae ouch d’r achter das te ’t meiste geregeld krigs aan ’t buffet bie ein glaas beer.
Eric blif bie de Raod van 11 en haet te kènne gegaeve nog oetveurende take op de achtergrondj te blieve doon.
Eric, names de hiële vereiniging en gemeinsjap bedank vaor diene inzet väör ós sjóan vereiniging!
Nuje sikkretaris
Gruetsj prezentere weer geliek ózze nuje sikkretaris Rik van Didden. Rik is same Maud in 2019 jubelejumprinsepaar gewaes, lid van de Raod van 11 en al ein paar jaor verantwoordelik väör de buffetbemanning tiejes diverse aktiviteite. Nao ein korte inwirkperiode is ’t dan noe ech offisjeel en maog Rik ’t sikkretariaat nao zien handj zètte. Uiteraard zal Eric op de achtergróndj nog óngersteune.
Rik, names de hiële vereiniging väöl sukses en bedank dat dich dees taak äöver wils numme.
Wilt geer kontak opnumme mit ós vereiniging? Ós nuje meeladres is: secretariaat@zawpense.nl
